Biznesi, kërkesa qeverisë. Qato: Do të heqim të gjitha burokracitë – ERTV

Biznesi, kërkesa qeverisë. Qato: Do të heqim të gjitha burokracitë

E kishin konceptuar mëngjes pune për tu prezantuar me ministren e Mbrojtjes së Sipërmarrjes, Sonila Qato, atë që e konsiderojnë si avokaten e interesave të tyre në qeveri, por sipërmarrësit nuk kanë mundur si të mos parashtronin kërkesat e tyre më imediate.

“Këshilli Kombëtar Ekonomik duhet të jetë pranë ministrit të Sipërmarrjes. Pranë këtij këshilli duhet të funksionojnë disa komisione. Ka ardhur koha për një ligj të ri të Këshillit Kombëtar të Ekonomisë, ku natyrisht ka vetëm dy palë: sipërmarrja dhe qeveria”, tha Luan Bregasi i “Biznes Albania”.

Ndërsa Ines Muçostepa, kryetare e Unionit të Dhomave të Tregtisë, u shpreh: “Në detyrën e rëndësishme që ju mbuloni, na konsideroni partnerët më të mirë. Së bashku të punojmë që roli i sipërmarrjes në vendimmarrjet lidhur me politikat ekonomike të forcohet. Bëhuni partnerja jonë më e afërt për forcimin e rolit të sipërmarrjes shqiptare në procesin e integrimit në tregjet rajonale dhe europiane”.

Agim Rrapaj, President i Këshillit të Agrobiznesit Shqiptar, deklaroi: “Janë 354 000 ferma dhe vetëm 30 000 janë të formalizuara. 90% janë të paformalizuara. Që mjedisi të marrë produktet tona, duhet të formalizohemi”.

Ministrja Sonila Qato u garantoi mbështeje të plotë dhe zhdukjen e të gjitha burokracive që krijohen ndaj tyre: “Qeveria dhe administrata do të vihen në dispozicionin tuaj pa kushte, në kufijtë e ligjshmërisë dhe transparencës së plotë. Kjo do të ndodhë përmes krijimit të një platforme efektive, konkrete dhe të drejtpërdrejtë të komunikimit mes nesh. Për të fuqizuar rolin tuaj në nivelet më të larta të qeverisjes dhe për të udhëhequr së bashku sipërmarrjen drejt një modeli të suksesshëm dhe të një kulture të re të bashkëqeverisjes”.