Partizani i Beogradit dokumentar për Fadil Vokrrin – ERTV

Partizani i Beogradit dokumentar për Fadil Vokrrin

Legjenda e futbollit kosovar dhe kryetari FFK-së, Fadil Vokrri, ndërroi jetë të shtunën pas një ataku kardiak, ndërsa të dielën u varros me nderime shtetërore, me pjesëmarrjen e madhe të qytetarëve në ceremoninë mortore

Vokrri la pas vetes një karrierë të pasur prej futbollisti dhe kontributin e paçmueshëm si kryetar i Federatës së Futbollit të Kosovës, në anëtarësimin e Kosovës në UEFA dhe FIFA.

Ai u cilësua si ikona e futbollit të Jugosllavisë, ku bëri karrierë të bujshme me Prishtinën dhe Partizanin e Beogradit. Pikërisht, kjo e fundit ka bërë edhe një dokumentar të shkurtër që e ka shfaqur në televizionin e klubit.

Disa prej momenteve më të rëndësishme, si dhe golat që nuk janë parë ndonjëherë, janë shfaqur në këtë film. 57-vjeçari ishte shpallur kampion me klubin serb, duke i sjellë titullin pas më shumë tre dekadave.

Në nderim të Vokrrit, i cili mbante postin e kreut të Federatës së Futbollit të Kosovës, presidenti Hashim Thaçi e shpalli 10 qershorit ditë zie në Kosovë. Mbrëmjen e djeshme, të shumtë ishin qytetarët e Kosovës që ndezën qirinj në nder të të ndjerit Fadil Vokrri.

Vokrri do të mbahet mend gjatë për karrierën e pasur në futboll në kohën e ish-Jugosllavisë, duke mbetur ndoshta i vetmi emër i shqiptarëve të Kosovës që duartrokitet edhe sot në Serbi.

Në nder të tij, flamuri i Kosovës është ulur në gjysmështizë në të gjitha përfaqësitë diplomatike kosovare në Gjermani.