Buxheti 2019, Qeveria parashikon rritje të përmbajtur të të ardhurave – ERTV

Buxheti 2019, Qeveria parashikon rritje të përmbajtur të të ardhurave

Të dhënat historike tregojnë, se përjashto vitin 2015 kjo është rritja më e ulët e të ardhurave në pesë vitet e fundit, në një kohë kur rritja ekonomike parashikohet me e larta në një dekadë.

Vetëm si pasojë e zgjerimit të ekonomisë dhe inflacionit që parashikohet për vitin 2019, të ardhurat e buxhetit duhet të rriteshin minimalisht me 6 për qind. Por qeveria ka preferuar të miratojë një buxhet konservator, ose parashikon se administrata fiskale nuk do të ketë të njëjtin rendiment si këtë vit.

Rritja e përmbajtur që parashikohet për të ardhurat dikton politikë të shtrënguar edhe në krahun e shpenzimeve. Sipas projektbuxhetit, për vitin e ardhshëm qeveria do të shpenzojë në 519.3 miliardë lekë, ose 4.4 për qind më shumë se sa shpenzimet e pritshme të këtij viti. Qeveria nuk i ka publikuar ende tabelat e detajuara të buxhetit, që tregojnë se si do të shpërndahen këto para. Por rritja me 4.4 për qind e shpenzimeve ka pak gjasa të sigurojë hop financimesh për sektorët kyç të ekonomisë, si shëndetësia, arsimi, apo dhe bujqësia, të cilët prej vitesh mbeten të keqfinancuar.

Më shumë se këta sektorë, edhe për vitin e ardhshëm, prioriteti kryesor I buxhetit mbetet ulja e borxhit. Huamarrja e re e qeverisë parashikohet në 1.9 për qind e prodhimit kombëtar, çka përbën një nga nivelet më të ulëta historike.