Meta kthen ligjin e buxhetit 2019: Reflektoni kërkesat e studentëve – ERTV

Meta kthen ligjin e buxhetit 2019: Reflektoni kërkesat e studentëve

Presidenti Ilir Meta kthen mbrapsht ligjin për buxhetin e Shtetit 2019 me argumentimin për të dhënë zgjidhje kërkesave të studentëve.

Me anë një të njoftimi, Presidenca bën të ditur vendimin e kreut të shtetit, i cili duket po kërkon që t’i shtyjë drejt një konsensusi mes qeverisë dhe studentëve, ku këta të fundit kanë 9 ditë që të protestojnë.

“Presidenti Ilir Meta, duke ndjekur me shumë vëmendje situatën politike më të fundit në vend, si dhe duke vlerësuar konsensusin e gjerë publik mbi kërkesat e studentëve, të cilat janë konsideruar nga të gjithë aktorët politikë si, të drejta, legjitime dhe të realizueshme, duke synuar interesin më të mirë në përmbushjen e objektivave sociale të parashikuara në nenin 59 të Kushtetutës, si dhe në garantimin e stabilitetit në vend, me dekretin nr. 10997, datë 13.12.2018 ka vendosur “Kthimin për rishqyrtim në Kuvend të ligjit nr.99/2018 “Për buxhetin e vitit 2019”, me qëllim rishqyrtimin e tij. Presidenti i Republikës, ka besimin e plotë se Kuvendi i Shqipërisë do të reflektojë një bashkëpunim gjithëpërfshirës me qëllim plotësimin e kërkesave të studentëve dhe interesit publik”, thuhet në reagimin e Presidencës.

Ky duket se është i vetmi kriter që ka ndikuar te Presidenti më kthimin mbrapsht të ligjit “Për buxhetin e shteti”, i miratuar në Parlament javën e shkuar vetëm me votat e mazhorancës.

Ndërsa ky vendim pritet të shkaktojë një përplasje të fortë politike me Presidentit dhe mazhorancës qeverisëse.