Nikolla mbron reformën: Koha do të më japë të drejtë

Ka më shumë se një javë që Lindita Nikolla si ministre e Arsimit është vënë në shënjestër të koreve studentore, ku qendra e protestës ka qenë poshtë dritareve të zyrës së saj.

Ministrja e di këtë dhe foli këtë të enjte në seancë plenare. Ajo tha se ka menduar dorëheqjen nga posti.

“Askush nuk do të dëshironte që të ishte në vendin tim. Kam punuar këto ditë sikur të ishte dita e fundit”, deklaroi ajo.

Nikolla është vënë në qendër të akuzave edhe për koston e çantave të saj, kryesisht nga rrjetet sociale. Ajo i cilësoi këto akuza të opozitës dhe grupeve që u cenuan nga reforma në arsimin e lartë.

“Luftës së çantave do t’i kisha shpëtuar nëse do të kisha administruar atë që e gjeta në arsim”, shtoi ajo.

Parrullat studentore i dëgjon prej ditësh dhe i ka mësuar përmendësh. Njëra prej tyre është “Lindita Nikolla dil në Bulevard, shkolla është e jona, jo biznes privat”.

“Po, shkolla është e juaja ndaj e akredituam universitetin, ndaj mbyllëm plot 22 kioska, ndaj vumë rregull dhe nuk i lamë të ishin vende ku shiteshin diploma pa asnjë vlerë”, u përgjigj ministrja.

Nikolla thotë se arsimi është në një reformë të përgjithshme, që nga kopshtet e deri tek universitetet dhe këmbëngul se kjo reformë është e duhura, por “koha do të flasë për të”.

Në fund, ministrja u tha sërish të drejtë studentëve, por përsëriti qëndrimin e Kryeministrit Edi Rama për dialog.

“Kanë të drejtë, por ftesa për të zhvilluar një betejë edhe më të vështirë është drejt tyre sot përmes një dialogu për të transformuar cilësisht universitetet tona. Unë jam e gatshme për të marrë çdo përgjegjësi”, mbylli fjalën e saj ministrja.