Politika shqiptare përshëndet themelimin e Ushtrisë së Kosovës – ERTV

Politika shqiptare përshëndet themelimin e Ushtrisë së Kosovës

Politikanët shqiptarë kanë përshëndetur krijimin e Ushtrisë së Kosovës. Në një postim në Facebook, presidenti Ilir Meta e quan vendim historik krijimin e Forcave të Armatosura të Republikës së Kosovës.

Postimi i Metës
Vendimi historik i krijimit të Forcave të Armatosura të Republikës së Kosovës dëshmon qartë që Kosova është e aftë të marrë përgjegjësi të reja në ndërtimin e institucioneve demokratike dhe për të kontribuar vendosmërisht për paqen, stabilitetin e rajonit dhe fqinjësinë e mirë. Fryma euro-atlantike qëndron në themel të këtij ndryshimi historik.

Kryeministri Edi Rama ka uruar popullin e Kosovës për krijimin e ushtrisë. Rama zgjodhi pikërisht foton e presidentit të Kosovës, Hashim Thaçi, i cili doli me uniformë ushtarake një ditë më parë teksa vizitonte kazermën “Adem Jashari”, duke i shtuar fjalën urime tri herë, shoqëruar me flamujt e Kosovës, Shteteve të Bashkuara dhe Bashkimit Europian.

Rama
“URIME, URIME, URIME”, shkruan Rama.

Gjithashtu, kreu i PD-së, Lulzim Basha e quan këtë ngjarjen e dytë te përmasave kombëtare dhe historike, pas Pavarësisë.

Postimi i Bashës
Urime Kosovë për Ushtrinë!

Pas Pavarësisë, ngjarja e dytë e përmasave kombëtare dhe historike. Me Ushtrinë e saj Kosova do të jetë më e sigurt, rajoni më në paqe, kombi shqiptar i integruar dhe më i fortë.
Nderim të rënëve për liri, mirënjohje miqve të mëdhenj që na mbështetën!